Vendosja e tritolit në shtyllat e tensionit të lartë nuk është një risi në Shqipëri. Por në ngjarjen e fundit, ende pa mbaruar hetimet gishti i akuzës u drejtua nga opozita. Ishte Taulant Balla dhe Elisa Spiropali që pa folur policia, thanë se kjo ishte vepër e opozitës.
Pas një reagimi nga PD, një konferencë e jashtëzakonshme u zhvillua dhe nga Ministria e Infrastrukturës dhe Energjisë si dhe Ministria e Brendshme. Zv/ministri i Brendshëm, Besfort Lamallari duke iu referuar dhe kodit penal, që e cilëson si sulm terrorist, tha se një akt i tillë dënohet nga 15 vite deri në burg përjetë.
“Fatmirësisht nuk ka pasur banesa afër, pasi mund të sillte dëme në jetë njerëzore. Grupi hetimor po punon për të zbardhur ngjarjen, si koha, motivet dhe autorët. Kjo vepër penale konsiderohet si terroriste dhe dënohet nga 15 deri në burg përjetë. Shpresojmë që kjo ngjarje mos ketë lidhje me politikën edhe pse gjuha që përdoret nxit dhe prodhon ngjarje të tilla“, tha ai.
“Në shtyllën 65 të linjës së tensionit të lartë 400 KW një linjë dyfishe, Tiranë-Podgoricë dhe Tiranë-Prizren është vendosur lëndë plasëse. Si rrjedhojë e shpërthimit është shkatërruar njëra këmbë e shtyllës dhe disa elemente mbajtëse të saj, të cilat kërcënojnë një dëmtim shumë serioz, pra rrëzimin e shtyllës. Për këtë arsye ka reaguar menjëherë OST dhe policia e Durrësit, të cilët janë në vendngjarje për riparimin e defektit dhe për verifikimet e rastit. Rrëzimi i shtyllës do rrezikonte të linte të gjithë vendin pa energji elektrike. Pra do kërcënonte sigurinë energjetike të Shqipërisë dhe në të njëjtën kohë, sigurinë kombëtare të vendit. Është një akt, mund të konsiderohet jo vetëm i dhunshëm, por edhe terrorist”, tha zv/ministri i Infrastrukturës dhe Energjisë, Ilir Bejtja.
Ngjarja sipas Policisë së Durrësit ka ndodhur në fshatin Krastë, Thumanë, ku është konstatuar se njëra këmbë e shtyllës dyfishe të tensionit të lartë (400 KW), Nr. 65, e linjave Tiranë–Podgoricë dhe Tiranë-Prizren është dëmtuar.
Në fillim të këtij viti, në 7 janar vendosja e një sasi eksplozivi dëmtoi një nga këmbët e shtyllës të linjës të tensionit të larte 400kV, Tirana2 – Podgoricë, në Fushë-Krujë. Flukset e energjisë që injektohen në këtë linjë ishin 50% e konsumit në gjithë vendin.
Në 13 maj të 2017 ndodhi një tjetër shpërthim në një shtyllë të tensionit të lartë në Kodër Thumanë të Krujës. Në atë kohë u shoqëruan disa banorë të zonës, por askush nuk u arrestua.
Në 14 tetor të 2015 eksploziv iu vu një tjetër shtylle të tensionit të lartë fshatin Arrameras të Krujës. Edhe në këtë kohë nuk pati as të ndaluar e as të arrestuar.
Dy shpërthime të tjera kanë ndodhur në vitin 2014, në vendin e quajtur Kodra e Zograçes, ndërsa në 5 nëntor të 2012 një sasi eksplozivi u vendos në linjën Tiranë-Vau i Dejës, në afërsi të fshatit Tresh./Opinion.al
