Me ardhjen e Gushtit edhe politika po pushon. Duhet thënë se në Tiranë tashmë nuk gjendet asnjë prej politikanëve të rëndësishëm. Kryeministri Edi Rama siç na ka treguar përmes rrjeteve sociale ka zgjedhur të kalojë pushimet në bregdetin e jugut, duke u vendosur në Dhermi me bashkëshorten dhe djalin e vogël, Zaho. Po kaq edhe ministrat i ka urdhëruar të pushojnë në Shqipëri dhe madje të promovojnë turizmin vendas.
Lulzim Basha është më diskret në këtë dejtim. Nuk kemi asnjë foto apo video nga pushimet e liderit democrat. Burimet e TCH thanë se “Basha po kalon disa ditë në Qerret të Kavajës”. Por, jo të gjithë në PD janë me pushime. Çdo ditë nga selia blu dalin deputetë që denoncojnë shkelje apo problem që prekin vendin. Aktivitetet pasqyrohen live dhe në faqen në facebook të kryetarit Basha.
Presidenti Ilir Meta, ndryshe nga Rama e Basha ka zgjedhur malin për të kaluar ditët e nxehta të sezonit veror. Ai ndodhet në Rugovë (Kosovë) dhe për aktivitetin e tij ka informuar rregullisht ndjekësit në rrjetet sociale, duke promovuar turizmin malor. Sakaq, sot dëshmoi në Instagram se pranë tij është edhe bashkëshortja Monika Kryemadhi, njëherë kryetare e LSI-së.
Sa i përket kryetarit të Kuvendit, Gramoz Ruçi, burimet thanë se ai është stacionuar si çdo vit në Vlorë.
/Opinion.al
