Besimtarët myslimanë kudo në botë festojnë sot Kurban Bajramin, që njihet ndryshe si Festa e Sakrificës. Kryeministri Edi Rama ka qenë ndër të parët që ka uruar besimtarët myslimanë. “Gëzuar Kurban Bajramin”, shkruan ai në Facebook.
Po ashtu në këtë ditë të shënuar një urim për besimtarët pati dhe ish-kryeministri Sali Berisha. “Të dashur miq, Besimtarët myslimanë shqiptarë sot kremtojnë ditën e Kurban Bajramit, ditën e mëshirës, durimit, përkushtimit dhe sakrificës së tyre ndaj Krijuesit për veten e tyre, familjen dhe vendin e tyre. Ndaj dhe ju ftoj që së bashku le të urojmë nga zemra gëzuar këtë Ditë të Shenjtë, dhe t’i lutemi Zotit të Madh që të gjithë durimin, përkushtimin dhe sakrificën e çdo shqiptari ta shndërrojë në të mira për të, familjen dhe vendin e tij. Gëzuar!” –shkruan Berisha.
Një mesazh dha edhe kreu i Bashkisë së Tiranës, Erion Veliaj, teksa vizitoi Komunitetin Mysliman Shqiptar këtë të mërkurë.“Kjo është dita e sprovës dhe Zoti provoi Ibrahimin nëse do sakrifikonte djalin e tij për të justifikuar besimin ndaj Zotit, ndaj një gjëje më të shenjtë. Në momentin e fundit i mbajti dorën sepse donte të shikonte nëse shërbëtori i tij ishte besnik dhe nuk ishte e nevojshme të bëhej ajo sakrificë. Edhe sot duhet të reflektojmë mbi kohën që jetojmë. Sot nuk na kërkohen këto lloj sakrificash, por duhet të sakrifikojmë disa gjëra gjithsesi, egot tona, mëritë tona, cic-micet tona. Një qytet bëhet më i mirë kur ne sakrifikojmë nga këto gjëra që janë detyrimisht të dobishme”, tha Veliaj.
Ambasada amerikane në Tiranë ka uruar po ashtu besimtarët myslimanë.
“Ambasada e SHBA në Tiranë u uron të gjithë atyre që festojnë Kurban Bajramin një ditë të gëzuar! Sot, besimtarët reflektojnë mbi sakrificat e bëra ndërsa vlerësojnë bekimet e tyre dhe ndihmojnë ata që kanë më pak fat. Gëzuar Kurban Bajramin”, shkruhej në një deklaratë të ambasadës.
Mijëra besimtarë myslimanë në të gjithë vendin festojnë sot, Kurban Bajramin. Të shumtë ishin ata që falën namazin në sheshin “Skënderbej” në Tiranë.
