Ditën e sotme u nda nga jeta në moshën 71-vjeçare një prej personaliteteve më të mëdha shqiptare, Moikom Zeqo. Studiuesi dhe shkrimtar nuk ia doli dot të fitojë betejën me sëmundjen e rëndë të leuçemisë akute.
Moikom Zeqo ka qenë deputet i PS në vitin 1996, por kryeministri Rama këtë humbje të madhe e kaloi me vetëm një fjalë “Lamtumirë”. Pas kritikave që iu bënë në rrjet, nga një fjalë, Rama i bëri dy, duke shkruar “Lamtumirë Moikom”.
Kaq pak e kaq thatë për këtë personalitet që i dha shumë historisë, kulturës e shkrimit në Shqipëri. Nga ana tjetër, kreu i PD Lulzim Basha është ndalur gjatë, duke theksuar që Moikom Zeqo ka qenë deputet i PS, si për ‘t’ia shtënë ndërmend’ Ramës
“Moikom Zeqo, eruditi i letrave shqipe u nda sot nga jeta pas një sëmundje të rëndë, duke lënë pas një vepër të lexuar dhe të vlerësuar nga shqiptarët anekënd botës. Me seriozitetin, pasionin për shkencën dhe kulturën, autori i 62 librave me poezi, studime arkeologjike, mbi historinë e artit, si dhe skenarëve për filma, do të mbahet mend ndër breza si një nga personalitetet e spikatura të kulturës sonë kombëtare. Angazhimi i tij në politikë si deputet i PS ishte dhe mbetet modeli i politikanit aktiv dhe serioz për përfaqësimin e qytetarëve. Ngushëllimet e mia shkojnë sot për familjarët e Moikom Zeqo, miqtë dhe shokët e tij që do ta kujtojnë gjithmonë me mall dhe respekt mjeshtrin e letrave dhe historisë shqiptare. U prehtë në paqe”, shkruan Basha.
Edhe presidenti Ilir Meta ka përcjellë një mesazh ngushëllimi për ndarjen nga jetë të Moikom Zeqos. Meta, i cili e ka dekoruar më parë shkrimtarin dhe me titull nderi, thotë se vdekja e tij është një humbje e madhe dhe e dhimbshme.
Po ashtu ai shton se trashëgimia e vyer që la pas Moikom Zeqo, do shërbjë si piketë e rëndësishme në kulturën dhe historinë e së ardhmes të kombit shqiptar.
“Thellësisht i tronditur për ndarjen nga jeta të Moikom Zeqos, mendimtarit të vyer, eruditit, zërit të fuqishëm, penës së fortë dhe poliedrike, intelektualit të angazhuar e të përkushtuar ndaj së mirës publike e interesit kombëtar, dhe njërit ndër shkrimtarët më prodhimtarë të letërsisë sonë. Me një personalitet njerëzor dhe intelektual të jashtëzakonshëm, dishepull i mirësisë, i miqësisë dhe humanizmit, i përkushtuar me fisnikëri ndaj virtytit dhe lirisë, përmes një jete të mbushur me kontribute të shumta e të çmuara, si shkrimtar, studiues, poet, arkeolog, politikan, eseist dhe si filozof, trashëgimia tepër e vyer akademike dhe kulturore që la pas Moikomi do shërbejnë përherë si piketa të rëndësishme në kulturën dhe historinë e së ardhmes të kombit tonë. Ngushëllimët më të sinqerta Lidës së dashur, fëmijëve, të afërmve, miqve e bashkëpunëtorëve të panumërt, për këtë humbje të madhe që le pas shumë dhimbje. Kujtimi dhe veprat e Tij do të mbeten të paharruara!”-shkruan Meta.
Ndërkohë, për ndarjen nga jeta të studiuesit dhe shkrimitarit ka përcjellë mesazh ngushëllimi dhe kreu i Kuvendit, Gramoz Ruçi.
“Me trishtim të thellë mësova ndarjen nga jeta të ish deputetit, shkrimtarit dhe shkencëtarit dhe publicistit të shquar Moikom Zeqo.Mikom Zeqo ishte një personalitet erudit i rrallë, një enciklopedi e gjallë. Shkrimtar, historian, arkeolog, studjues e kritik letrar, përkthyes dhe publicist, mbi të gjitha një intelektual i shquar dhe patriot i madh. Ai i shërbeu Shqipërisë dhe kulturës shqiptare deri në ditët e fundit të jetës, me një dashuri e përkushtim të pashoq. Mikom Zeqo luftoi me stoicizëm ndaj sëmundjes për një kohë të gjatë, duke mos e ndërprerë për asnjë çast kontributin e tij intelektual për Shqipërinë. Moikom Zeqo u zgjodh dhe shërbeu si deputet i Kuvendit të Shqipërisë në legjislaturën 1992-1996 dhe u shqua për thellësinë e mendimit, largpamësinë e vizionit, urtësinë për dialog, përkushtimin për qytetarët dhe angazhimin sipëror për kulturën dhe çështjet e mëdha të shoqërisë dhe të kombit shqiptar. Gjithë erudicionin e tij Moikomi ua kushtoi dhe ua shpërndau Shqipërisë dhe shqiptarëve. Lamtumirë Moikomi ynë i dashur!”, shkruan Kryetari i Kuvendit, Gramoz Ruçi./ Opinion.al
