Politika shqiptare sot është në zi, në nder të ish-deputetit të Partisë Demokratike Gert Bogdani, i cili u nda nga jeta para kohe në moshën 44-vjeçare.
Bogdani humbi jetën si pasojë e një ataku kardiak teksa ka qenë duke konsumuar kafe me miqtë e tij.
“Lajm i kobshëm ndarja e papritur nga jeta e kolegut tonë dhe ish-deputetit, Gerti Bogdani. Zor të gjesh fjalë që zbusin peshën e rëndë të dhimbjes e të zemrave të bëra gur prej tronditjes. Ngushëllime bashkëshortes, fëmijëve e familjarëve të Gertit. U prehsh në paqe e dritë të pastë shpirti”, shkruan nënkryetari i Kuvendit, Bledi Çuçi.
“I keqardhur për ndarjen e parakohshme nga jeta të Gert Bogdanit – ngushëllime bashkëshortes dhe familjes. U prehtë në paqe!”, shkruan Veliaj.
”Ndarja nga jeta në mënyrë të papritur e mikut tonë Gert Bogdani është nga lajmet më të rënda që kam përjetuar këto kohë! Qofsh i parajsës miku im”, shkruan Edith Harxhi.
“E pa besueshme,lajm i trishtë,lajm i zi,lajm shokues.Ndahet nga jeta ne moshen 44 vjeç ish Deputeti Gert Bogdani.Humbje e madhe per Partinë Demokratike dhe vendin.Ishte i shkolluar ne Amerik me rezultate te shkelqyer, intelektual, politikan, familjar model.I paharruar kujtimi dhe vepra e tij,u prehte ne paqe.Ngushellime familjes”, shkruan Lefter Maliqi.
“Tronditës lajmi për ndarjen e parakohshme nga jeta të kolegut tonë Gerti Bogdani. Një zë frymëzues në politikën shqiptare, në mbështetje të të rinjve dhe profesionistëve.
U prehsh në paqe, Gerti!”, shkruan Peleshi.
“Jam sinqerisht pa fjalë…!
Ikja e parakohshme e një djali si Gerti, është një humbje e pazëvendësueshme jo vetëm për familjen e tij biologjike, por edhe për PD, familjen e tij politike dhe krejt shoqërinë tonë! Gerti ishte një familjar, politikan dhe qytetar 24 karatësh! Tirana sot humbi një djalë model!
Qofsh i Parajsës Gert”, shkruan Këlliçi.
