Sot kremtohen Pashkët katolike. Kryeministri Rama ka zgjedhur t’i urojë ato me anë të një videoje.
Momente festive, familja e mbledhur rreth tavolinës dhe ushimet tradicionale përmblidhen në videon e publikuar nga kryeministri. “Pashkë të gëzuara” është mesazhi i tij i shkurtër bashkëngjitur me të.
https://www.facebook.com/edirama.al/videos/276505033345676/
Nga ana tjetër, kryetari i Partisë Demokraike Lulzim Basha ka uruar Pashkët në emër të familjes së tij duke shkruar se kjo festë duhet të shërbejë për të ndezur dritën e shpresës se ditë më të mira na presin.
Kreu i opozitës thekson në urimin e tij se një lutje e veçantë shkon për ata që po përballen në vijën e parë me koronavirusin.
“Të dashur motra dhe vëllezër që kremtoni këtë ditë të shenjtë të Pashkës dhe Ringjalljes së Jezu Krishtit, unë dhe familja ime ju urojmë nga zemra, për shumë vjet Pashkët!
Një urim dhe lutje të veçantë kam sot për ata që po përballen me sëmundjen, për personelin shëndetësor, për punonjësit e policisë, të forcave të armatosura, për klerikët dhe shërbëtorët e Zotit, për prindërit dhe vogëlushët në familjet në nevojë, për të moshuarit, për të sëmurët e më të pamundurit.
Në këto kohë të vështira, drita e shpresës dhe kurajos ndeztë në zemrat dhe mendjet e çdo familje shqiptare besimin se ditë më të mira na presin.
Zoti ju bekoftë ju dhe familjet tuaja, Zoti e bekoftë Shqipërinë dhe shqiptarët kudo ku janë!”, shkruan Basha.
Festa e Pashkëve i ka gjetur ndryshe kësaj radhe besimtarët pasi ata qëndrojnë të izoluar për shkak të masave kundër koronavirusit.
Katedralet dhe kishat ishin të boshatisura në mesnatë ndryshe nga e zakonshmja ku mijëra qytetarë dynden për të marrë pjesë në meshën tradicionale ku ndezin dhe qirinjtë. /Opinion.al
