Sot kremtohen Pashkët katolike. E në këtë ditë të shënuar për besimtarët katolikë nuk kanë munguar urimet e figurave më të larta të politikës. Presidenti Bajram Begaj në një postim në rrjetet sociale shkruan se fryma e pashkëve shpresa, dashuria dhe jeta e gëzueshme të bekojë jetën e shqiptarëve.
“Gëzuar Pashkët për të gjithë besimtarët katolikë! Shpresa, dashuria dhe jeta e gëzueshme që frymë e Pashkëve përcjell bekoftë jetën tuaj!”-shkruan Begaj.
Kryeministri Rama thotë se kjo ditë simbolizon Ringjalljen e Krishtit ndërsa shton se celebron dashurinë e pafundme dhe sakrificën për njeriun.
“Dhe me ditën e Ringjalljes së Krishtit, që celebron dashurinë e pafundme dhe sakrificën për njeriun, ju uroj gëzuar Pashkën Katolike”, shkruan Rama.
Një urim ka shkruar në rrjetin social “Facebook” edhe ish-kryeministri Sali Berisha.
“Gëzuar Pashkët! Të dashur miq, sonte besimtarët katolik shqiptar dhe të të gjithë botës festojnë Pashkën, ditën e ringjalljes të Krishtit Mbret. Pashka, dita e ringjalljes së Hyijt është për çdo njeri, për të gjithë besimtarët, ditë e besimit të madh tek Zoti, te mirësia dhe gjithëfuqia e tij. Vetishëm Pashka është ditë e shpresës së pashuar, e frymëzimit të njeriut nga vlerat hyjnore dhe njerëzore dhe një e ardhme më e mirë. Kjo ditë e bekuar i ka gjetur kësaj rradhe Shqipërinë, besimtarët katolik dhe miqtë e tyre të besimeve të tjera para një zgjedhje historike me datën 14 maj. Duke ju uruar të gjithë besimtarëve katatolik këtë ditë të shenjtë, ju ftoj të dashur miq t’i lutemi ne Zotit që të bekojë Shqipërinë, shqiptarët kudo që janë dhe votën e tyre për rivendosjen e pluralizmit në Shqipëri. Pashkën tjetër më mirë ta festojmë! Gëzuar! #sb”-shkruan Berisha.
Sakaq, kreu i Partisë së Lirisë, Ilir Meta iu ka uruar besimtarëve katolikë Pashkë të Bardha.
“Të gjithë besimtarëve katolikë dhe ungjillorë ju uroj nga zemra, Pashkë të Bardha! Qofshi të gëzuar pranë familjeve e më të dashurëve tuaj. Mesazhi i ringjalljes që kjo festë sjell, uroj të jetë ringjallje dhe e Shqipërisë sonë, në të gjitha aspektet”-shkruan Meta./Opinion.al
