Nga e hëna pritet të rinisë procesi mësimor në universitetet e Tiranës. Në disa prej tyre ky proces u pezullua për shkak të dëmeve të shkaktuara nga tërmeti i 26 nëntorit dhe për pasojë studentët humbën disa javë mësimi të cilat do të zëvendësohen gjatë muajit janar.
Kështu, Univeristeti Politeknik i Tiranës ka vendosur që 3.5 javët e humbura do të kompensohen duke zhvilluar mësim edhe gjatë fundjavave, 3 të shtuna të muajit janar, 3 të shtuna dhe 1 të dielë të muajit shkurt. Ndërsa për semestrin e dytë, studentët e inxhinierisë do të bëjnë mësim dhe të shtunave të muajve mars, prill dhe maj.
Universiteti i Mjekisë në Tiranë dhe Fakulteti i Inxhinierisë së Ndërtimit në Universitetin Politeknik të Tiranës nuk zhvilluan mësim përgjatë gjithë muajit dhjetor. Rektoratet vendosën që procesi të riniste më 6 janar kur edhe godinat të ishin riparuar nga dëmet e shkaktuara nga tërmeti.
Ende nuk ka një vendim të Universitetit të Mjeksisë për mënyrën se si do të zëvendësohen orët e humbura gjatë dhjetorit. /Opinion.al
