Efektivi i Komisariatit Numër 1 në Tiranë, Ermal Bregu, 33-vjeç, mbrëmjen e sotme, mbeti i plagosur në zonën e ish-parkut të autobusëve, pas një konflikti me dy persona.
Mësohet se para dy vitesh, 33-vjeçarit, i kanë djegur makinën tip ‘Hummer” para shtëpisë, gjatë natës.
Përmes një njoftimi për mediat, policia tha se të shtënat me armë zjarri kanë qenë direkt në drejtim të punonjësit të policisë, por Bregu ka qenë jashtë shërbimit.
Të njëjtat burime thanë se ai është konfliktuar me dy persona pranë një lokali, por ngjarja nuk ka lidhje me detyrën e punonjësit të policisë.
Mësohet se në vendin ku ndodhi ngjarja, efektivi ka shtëpinë dhe ai ka qenë jashtë orarit të shërbimit.
Ai është dërguar në spital dhe ndodhet jashtë rrezikut për jetën.
Policia vijon kërkimet për identifikimin dhe kapjen e autorëve.
