Kultivimi i kanabisit vazhdon ende. Policia e Mallakastrës ka goditur një tjetër rast. Sipas njoftimit zyrtar, një 38-vjeçar nga Vlora është shpallur në kërkim.
Në vendin e quajtur “Gropa e Bllacës” janë evidentuar një sasi kubikësh dhe fidanësh në tentativë për t’i kultivuar si edhe 1 armë gjahu, 1 motoçikletë, 1 automjet që i përkasin 38-vjeçarit F.M, nga Vlora.
Rreth një javë më parë, policia zbuloi në jug të Shqipërisë vatrat e para të mbjella me kanabis për këtë vit. Kontrolli nga ajri ka zbuluar katër sipërfaqe në fshatrat Xhafaj dhe Krahës në zonën e Memaliajt, të cilat më pas janë dokumentuar në terren nga efektivat policorë. Kjo zonë është njohur edhe gjatë viteve të shkuara për kultivimin e marijuanës.
Policia ka ndaluar një inspektor pyjor dhe kryeplakun e fshatit, pasi ligji i detyron zyrtarët vendorë të japin informacion për mbjellje të narkotikëve në zonat e tyre.
Trafikantët shfrytëzojnë kryesisht terrene të thyera në zona malore afër burimeve ujore për të kultivuar vatrat me narkotikë.
Policia zhvilloi muajin e shkuar një fushatë për parandalimin e kultivimit të kanabisit, por në terren ka sfida konkrete që lidhen si me veprimet operacionale edhe me bashkëpunimin me pushtetin vendor dhe evidentimin e sipërfaqeve që rezultojnë në një masë të madhe pa pronar.
Zonat në jug të Shqipërisë kanë qenë më të prekura vitet e fundit nga kultivimi i kanabisit. Pas ndërhyrjes policore në fshatin Lazarat 5 vite më parë grupe kriminale investuan në zonat e tjera për të kultivuar në terrene të thyera sipërfaqe të mëdha me bimë narkotike./ Opinion.al
