Në 9 Maj të këtij viti Ministri i Brendshëm, Sandër Lleshaj në një mbledhje me zyrtarët e lartë të policisë ju drejtua atyre duke ju thënë se “çdo bimë kanabis që do të kapet pas datës 15 qershor është përgjegjësia juaj”.
Sot Policia e Gjirokastrës ka zbuluar një parcelë me afro dy mijë rrënjë kanabis në një pyll në fshatin Fllomo të Dropullit.
Pas informacioneve të marra, policia organizoi operacionin zbulimin dhe asgjësimin e bimëve.
Ndërkohë ende nuk është kapur personi i cili ka kultivuar këtë sasi droge, i cili është shpallur në kërkim.
Në fshatin Sopil të Dropullit, rreth një javë më parë policia zbuloi dhe asgjësoi 120 rrënjë kanabis. Të dyshuarit për këtë ngjarje janë kryeplaku i fshatit së bashku me një punonjës të Bashkisë së Dropullit të cilët po hetohen në gjendje të lirë.
Gjithashtu edhe në fshatin Dragot të Tepelenës u zbuluan 20 rrënjë kanabis për të cilat u arrestua një 29-vjeçar.
Mesa duket problemi i kultivimit të kanabisit është ende i pranishëm në territorin shqiptar madje edhe në përmasa mbi 1 mijë rrënjë. /Opinion.al
