Detaje të reja kanë dalë nga operacioni policor i zhvilluar mëngjesin e sotëm në Elbasan për kapjen e personave të shpallur në kërkim midis të cilëve edhe i shumëkërkuari për vrasje me porosi, Suel Çela.
Mësohet se Policia dhe FNSH kanë zbarkuar pranë tregut agro-ushqimor të Elbasanit si dhe në shtëpinë e Çelës gjatë orëve të natës, ku kanë kryer kontrolle të imtësishme. Sipas A2 CNN është shoqëruar i ati dhe vëllai i Suel Çelës.
Suel Çela është person i shpallur në kërkim prej vitesh për disa ngjarje të rënda kriminale dhe hetimet nga tij po ndiqen edhe nga Byroja Kombëtare në varësi të SPAK dhe hetuesit belgë.
Deri me tani policia ka dështuar të arrestoje Çelën edhe pse janë zhvilluar disa operacione.
Suel Çela akuzohet se ka porositur atentatin e dështuar të 29 marsit 2022 ndaj Elton Kilës, që do ta kryente bashkëpunëtori i drejtësisë, Nuredin Dumani, por i cili mbeti i plagosur rrugës dhe më pas u arrestua./Opinion.al
