Policia e Shtetit ka reaguar pasi hakerat iranianë dyshohet se publikuan të dhëna të marra nga sistemi MEMEX i policisë, që përmban të dhëna për persona të dyshuar apo në hetim për ngjarje kriminale.
Në një njoftim për mediat policia sqaron opinionin publik se ky sistem nuk është prekur dhe se këto të dhëna nuk kanë të bëjnë me databazën e sistemit policor MEMEX.
Po ashtu policia njofton se po hetohet origjina e rrjedhjes së këtyre të dhënave dhe apelon që, në zbatim të urdhrit të prokurorisë të mos publikohen nga mediat të dhënat që postohen nga autorët e sulmit kibernetik ndaj sistemeve dixhitale të Policisë së Shtetit.
“Nga deklarimet e bëra sot në media dhe referimet e këtyre deklarimeve, sipas të cilave janë marrë të dhëna nga sistemi MEMEX, sqarojmë opinionin publik se ky sistem nuk është prekur dhe se këto të dhëna nuk kanë të bëjnë fare me databazën e sistemit policor MEMEX.
Policia e Shtetit njofton se, deri në këto momente, nuk janë prekur apo dëmtuar të dhëna sensitive që administrohen në këtë sistem, të cilat kanë të bëjnë me punën policore.
Policia e Shtetit, në bashkëpunim të ngushtë me partnerët, po heton origjinën e rrjedhjes së këtyre të dhënave dhe apelon që, në zbatim të urdhrit të prokurorit, të datës 19.09.2022, të mos publikohen nga mediat audiovizive, të shkruara, online, në rrjete sociale apo në çdo formë të publikimit apo transferimit, të dhëna që postohen nga autorët e këtij sulmi kibernetik ndaj sistemeve dixhitale të Policisë së Shtetit”-njofton policia.
