Një sasi e konsiderueshme parash janë sekuestruar sot në Portin e Durrësit. Mësohet se sasia e parave në Paund ishte fshehur në shasinë e një furgoni.
Deri më tani ende nuk është e qartë shuma e saktë e parave. Furgoni ka ardhur nga porti i Ankonës në Itali dhe ka mbërritur në Durrës rreth orë 12:00.
Furgoni ishte i ndaluar, pasi ishte me risk dhe duhej të kontrollohej në çdo kalim në portin e Durrësit. Mësohet se furgoni bënte transport mallrash mes Shqipërisë dhe Anglisë prej disa kohësh.
Sinjalizimi për furgonin e mbushur me paund britanik ka ardhur nga autoritetet angleze. Të pranishëm në kontrollin e furgonit ishin Drejtori i Policisë së Durrësit, Lorenc Shehu, nëndrejtori, shefi i Krimit Ekonomik dhe Drejtori i Doganës së Durrësit.
Policia deri tani ka ndaluar shoferin, rreth 20 vjeç. Shoferi i ndaluar ka deklaruar se nuk ka dijeni për paratë te furgoni, pasi bën transport mallrash nga Anglia në Shqipëri./Opinion.al
