Parandalohet në qytetin e Lushnjës një grabitje me armë.
Tre të rinj janë shpallur në kërkim nga Policia, pasi kishin planifikuar që të kryenin grabitje me armë, ndërsa në përpjekje për tu larguar rrezikuan jetën e efektivëve të policisë. Policia ka shpallur në kërkim shtetasit Renato Çala, 30-vjeç, Florenc Tatoshi, 36-vjeç, dhe Bukurosh Mukja, 66 vjeç, të tre banues në Elbasan.
Sipas Policisë autorët qarkullonin me një automjet me targa të falsifikuara dhe më pas e kanë braktisur automjetin, por janë identifikuar dhe janë shpallur në kërkim.
“Gjatë ndjekjes nga Policia, në kuadër të operacionit policor të koduar “Parandalimi”, në vendin e quajtur “Rotondo e Çermës”, punonjësit e Policisë kanë lokalizuar automjetin e dyshuar dhe i kanë bërë shenjë për të ndaluar, por drejtuesi i automjetit nuk i është bindur urdhrit të punonjësve të Policisë për të ndaluar dhe ka shtuar shpejtësinë duke rrezikuar jetën e punonjësve të Policisë që ishin në rrugë, për të ndaluar këtë automjet.”
Shërbimet e Policisë janë vënë menjëherë në ndjekje të automjetit tip “Benz” i cili po lëvizte me shumë shpejtësi në drejtim të fshatrave të Peqinit. Për shkak të shpejtësisë së madhe, automjeti ka dalë nga rruga dhe tre shtetasit që udhëtonin në automjet e kanë braktisur atë dhe kanë mundur të largohen, duke përfituar nga errësira.”
Policia bën me dije se është sekuestruar një sasi municioni luftarak dhe automjeti i autorëve.
Ndërkohë që tre shtetasit në kërkim akuzohen për veprat penale “Mosbindja ndaj urdhrit të punonjësit të policisë së rendit publik”, “Prodhimi dhe mbajtja pa leje e armëve dhe municionit luftarak” dhe “Falsifikimi i vulave, i stampave ose i formularëve”.
Materialet i kaluan Prokurorisë pranë Gjykatës së Rrethit Gjyqësor Lushnjë, për veprime të mëtejshme./Opinion.al
