Kur e gjithë policia është në terren, të paktën siç pretendohet nga njoftimet e shpërndara në mediat, krimi godet sërish. Në mes të ditës, në lagjen nr 12 në Durrës është grabitur një banke të nivelit të dytë.
Ngjarja ka ndodhur rreth orës 14:24, kur një person ende i paidentifikuar nën kërcënimin një arme zjarri tip pistolete ka marrë lekët mbi banak, një shumë rreth 100.000 lekë dhe është larguar me vrap.
Policia e qytetit bregdetar thotë se me marrjen e njoftimit janë vënë në ndjekje të autorit ku është rrethuar zona në një perimetër të gjerë. Në kontroll të zonës është angazhuar edhe FNSH dhe forca e posaçme “Shqiponjat”, ku vijon kontrolli edhe me pika kontrolli në rrugica e rrugë kryesore.
Mbrëmjen e djeshme, por edhe paraditen e kësaj të shtune, policia njoftoi se kish zbritur në terren me pika të shumta kontrolli në disa qytete. Operacionet, sipas policisë ishin përqendruar kryesisht në kontrollet e detajuara të mjeteve për mbajte të lëndëve narkotike, apo mjeteve të paligjshme, si dhe për personat e shpallur në kërkim.
Por edhe pse kontrollet, që thuhet se ishin të befasishme dhe të shumta në numër, nuk kanë ndalur krimin dhe pasigurinë në vend./ Opinion.al
