Policia pasi njoftoi arrestimin e dy personave të dyshuar për vrasjen e biznesmenit Memli Begalla në zonën e Bllokut ka publikuar edhe pamjet ku shihet edhe një moment nga kamerat e sigurisë ku autorët lëvizin qetësisht pas vrasjes. Të arrestuarit janë Denis (Alban) Demiri, 43 vjeç, banues në Tiranë dhe Ardian Serezi, 49 vjeç, banues në Tiranë.
Sipas policisë ekzekutori është Denis Demiri dhe pista kryesore ku janë fokusuar hetimet është ajo e borxheve që nuk kishte shlyer viktima.
Në cilësinë e provës materiale është sekuestruar një automjet me targa të huaja, me të cilin autorët janë larguar nga vendi i ngjarjes. Gjithashtu është sekuestruar një automjet në pronësi të shtetasit Denis Demiri, si dhe 9 telefona celularë.
Nga pamjet duket qartë se autorët zbresin nga makina me bluza me kapuç në kokë, kryejnë vrasjen me silenciator dhe kthehen po prapë në BMW. Po kështu policia tregoi edhe momentin e arrestimit të tyre.
