Një person i kërkuar nga autoritetet ndërkombëtare, është arrestuar nga policia mëngjesin e sotëm. Mësohet se në pranga ka rënë Tafil Vokri, 56-vjeç i cili akuzohet për kryerjen e disa veprave penale.
Njoftimi i policisë:
Vijon puna për kapjen e personave në kërkim ndërkombëtar. Më datë 19.10.2017, Shërbimet e Sektorit të Forcës së Posaçme të Operacioneve Speciale dhe Kërkimit, në Drejtorinë Vendore të Policisë Tiranë, kanë bërë të mundur kapjen e shtetasit në kërkim ndërkombëtar; – Tafil Vokrri, 56 vjeç, banues në Kavajë.
Ky shtetas është i shpallur në kërkim pasi, Gjykata Catanzaros / Itali, me vendimin e datës 02.11.2005, ka lëshuar urdhërin e kërkimit ndërkombëtar, pasi ka caktuar masën e sigurisë “Arrest me burg”, për kryerjen e veprave penale “Pjesëmarrje në organizatë kriminale”, “Trafikim i lëndëve narkotike” dhe “Trafikim i armëve të zjarrit”, parashikuar nga Neni 110 i Kodit Penal Italian si dhe Nenet 73 dhe 309/90 të ligjit mbi drogat.
Veprimet e mëtejshme po kryen nga Specialistët e Interpol Tirana, me qëllim ekstradimin e tij drejt Shtetit Italian.
