TIRANE- Edi Rama duke folur për herë të parë në lidhje me akuzat e opozitës për lidhjet e tij me Shullazin. Këto janë akuza të pabaza për të cilat, Paloka është dënuar njëherë nga gjykata, tha Rama.
Ai më tej shpjegoi se arrestimi i Shullazit është bërë nga Policia me iniciativën e saj dhe urdhër-arresti nga prokuroria ka dalë në mesnatë.
Pjesë nga fjala e Ramës në Parlament
Nuk e kisha ndërmend të merrja fjalën sidomos pasi dëgjova Zonjën Jozefinë që foli për një ligj të rëndësishëm. Mora shkas nga ajo që tha parafolësi (Edi Paloka) të dënuarin nga gjykata për shpifje. Ekzaktësisht për këtë temë e kam çuar këtë Zorëti (Palokën) në gjykatë dhe nuk arriti të provojë asgjë. Rrinte si pulë në gjykatë dhe thoshte se këto gjëra mi ka thënë partia. Ky shpifës profesionist ka kurajon të dalë prapë sot. Si ka mundësi që nuk latë hero të botës së krimit pa e bërë hero të politikës suaj? Nuk latë të dyshuar, të arrestuar, të kërkuar që nuk e kthyet në personazh të Politikës për keq apo për mirë (rasti Zagani).
Kush e ka arrestuar Shullazin? E verteta është pak ndryshe nga çka është shkruar këto ditë. Ndalimi është bërë nga policia e cila ka filluar procedurën pa pasur një denoncim konkret duke u nisur nga një indicie e paprovuar. Pra e ka ndaluar pa autorizim nga prokuroria. E ka marrë autorizim pas mesnate nga prokuroria, kur personazhi në fjalë ka qenë në qeli.
