Një ditë pasi disa prej kryetarëve të bashkive i bën thirrje KQZ të zbatojë dekretin e presidentit dhe të lirojë ambientet e përshtatura për KZAZ, policia e shtetit ka nisur ruajtjen e tyre.
Pranë pallatit të Sportit “Ferti Hysa” në Burrel është vendosur një mjet i komisariatit të Policisë së Matit. Efektivët qëndrojnë aty që prej ditës së premte duke mbrojtur zyrat ku janë vendosur materialet zgjedhore të KZAZ 16.
Në Kavajë disa punonjës bashkie u arrestuan pasi hoqën listat e zgjedhësve nga shkollat.
Kjo situatë ka nisur të reflektojë problemet që mund të shfaqen mes bashkive dhe KZAZ-ve në rast se zgjedhjet vendore mbahen më 30 qershor.
Kujtojmë se deri tani 27 bashkitë e drejtuara nga PD, LSI dhe PDIU i kanë bërë thirrje KQZ të zbatojë dekretin e presidentit. Nga ana tjetër kjo e ka cilësuar atë si një akt nul dhe ka vazhduar me organizimin e procesit zgjedhor. Presidenti Meta dje bëri thirrje që të gjitha institucionet ti qëndrojnë konform ligjit sepse në të kundërt do të përballen me pasojat. /Opinion.al
