Akoma nuk kishte asnjë komunikim zyrtar, as nga policia, klubi apo familjarët edhe pas 24 orësh. Klubi i Leiçesterit në mbrëmjen e së shtunës humbi presidentin e tij, Vikai Srivadhanaprabha, në aksidentin që ndodhi kur helikopteri i tij u rrëzua pak pas ndeshjes kundër Uest Hemit.
Lajmi se ai ndodhej në bordin e helikopterit, u konfirmua nga burime të afërta të familjes dhe më vonë nga autoritetet. Helikopteri privat i biznesmenit tajlandez u përplas në parkingun e stadiumit. Duke shkaktuar një lëmsh të madh zjarri menjëherë pas ngritjes nga qendra e stadiumit. Rrëzimi ndodhi pak metra larg vendit që përdoret si parking i personelit në rrugën “Filbert”.
Nga informacionet e para, helikopteri mendohet se është rrëzuar prej një defekti në motor (u bllokua helika e bishtit). Dhe u rrotullua rreth vetes përpara se të përplasej në tokë.
Autoritetet 24 orë me vonesë dolën me një komunikim që konfirmoi vdekjen e presidentit të Leiçesterit dhe katër pjesëtarëve të tjerë të ekuipazhit të helikopterit të tij: dy anëtarë të stafit, Nursara Suknamai dhe Kaveporn Punpare, piloti Erik Suafer dhe pasagjerja Izabela Roza Lekovic, ish Miss Tajlanda 2005.
Zhurma e madhe u pasua nga një lëmsh i madh zjarri. Që prej orëve të natës dhe orëve të para të mëngjesit, futbollistët dhe tifozët nisën homazhet përpara “King Power Stadium”. I cili u mbush me lule, shalle, flamuj dhe të tjera kujtime për nder të presidentit. Ai bleu klubin në vitin 2010 dhe në maj të 2016-ës preku suksesin në Premier Ligë me skuadrën e ëndrrave të udhëhequr nga Ranieri.
Trajneri Klod Puel, i cili mendohej se ndodhej në bordin e helikopterit, konfirmoi se ishte shëndoshë e mirë:
“Jam mirë, por jemi të gjithë të tronditur. Të gjitha mendimet dhe lutjet e mia shkojnë për viktimat dhe familjet e tyre”./Panorma Sport
