Një makinë tip “Renault” është gjetur e djegur në periferi të qytetit të Fierit, ndërsa brenda saj u zbulua një kallashnikov me karikator. Zyrtarisht Policia e Fierit thotë se automjeti është përdorur në një atentat në lagjen “8 Shkurti” rreth orës 11:45.
Persona të paidentifikuar ende, që ishin në bordin e këtij automjeti, qëlluan me armë në drejtim të një lokali në pronësi të qytetarit me iniciale A.B. Fatmirësisht nga të shtënat me armë nuk ka persona të lënduar, por vetëm dëme materiale pasi janë thyer xhamat e lokalit.
Makina është larguar në drejtim të Semanit dhe rreth orës 11:50 është gjetur e djegur në lagjen “15 Tetori” Fier. Forca të shumta policore kanë nisur aksionin për kapjen e autorëve dhe po kontrollojnë zonën. Ndërkohë, hetimet janë duke vijuar për të zbardhur tërësisht motivet e kësaj ngjarje.
