Policia italiane ka ngritur alarmin për kapjen e dy vëllezërve shqiptarë të cilët akuzohen për qindra vjedhje. Bëhet fjalë për Edmond dhe Eduard Trushin, aktiviteti kriminal i të cilëve shtrihet zonën e Udinës në Itali. “Nëse i shihni telefononi në 112,” – ka bërë thirrje policia.
Dy vëllezërit dyshohet se kanë kryer disa krime në disa banesa, por edhe nëse do të kapeshin, mediat italiane raportojnë se do të mbetej i njëjti problem, është pothuajse e pamundur t’i dënosh. Kjo për shkak se janë identikë dhe nuk mund të dallohen në pamje: e njëjta prerje flokësh, të njëjtat veshje dhe madje të njëjtat tatuazhe. Madje dhe testet e ADN nuk mund të arrijnë në konkluzione përfundimtare se kush prej të dyve është autori i krimit, pasi dhe ADN është shumë e ngjashme. Pikërisht për këtë arsye është e vështirë që dy vëllezërve t’i atribuohen krimet.
Në vitin 2014, policia gjeti ADN-në në një makinë të vjedhur. Nga ato gjurmë u gjurmua tek Eduard Trushi, por në gjyqin e zhvilluar ai u shpall i pafajshëm pasi nuk ishte mundur “përtej një dyshimi të arsyeshëm” të konstatohej se cili prej të dyve ishte në timon.
Vëllezërit duket se po përfitojnë nga kjo gjë dhe po e përdorin atë pasi sipas autoriteteve ata asnjëherë nuk e kryejnë një vjedhje së bashku.
