Pak minuta pas publikimit nga policia të fotos së një personi që dyshohej se ishte një nga bashkëpunëtorët e grabitjes së bankës një ditë më parë, ky i fundit është paraqitur në ambjentet e drejtorisë së policisë.
Shtetasi i identifikuar si E. Kodra ka dhënë një dëshmi të plotë se përse ndodhej pranë bankës në momentin para ngjarjes.
Ai ka mohuar të ketë lidhje me grabitësit apo që të ketë ndihmuar në veprimet kriminale.
I pyetur nga oficerët e policisë gjyqësore se përse ndodhej aty , ai ka shpejguar se do kryente veprime në bankomat për tërheqjen e një shume parash që ai i ka depozituar si klient i bankës.
Më herët policia publikoj foto të E.Kodrës që ndodhej pranë bankës , duke ngritur dyshimet se ai ishte një nga bashkëpunëtorët në ngjarje.
Burime nga policia bëjnë me dije se ky shtetas 10 minuta para dhe gjatë momentit të grabitjes fillimisht i është afruar bankomatit dhe më pas ka qëndruar aty deri në momentin që është kryer grabitja dhe më pas është larguar.
Dy persona të maskuar dhe të armatosur grabitën nën kërcënimin e armës një sasi parash në një bankë të nivelit të dytë në zonën pranë kryqëzimit të “21 Dhjetorit” në Tiranë.
Megjithë hetimet intensive ende nuk ka asnjë të ndaluar për ngjarjen.
