Policia e Vlorës ka ushtruar kontrolle për të parandaluar shitjen e lëndëve piroteknike dhe fishekzjarrëve që rrezikojnë sigurinë publike, jetën dhe shëndetin e njerëzve.
Nga kontrollet, janë evidentuar 3 subjekte të cilat tregtonin lëndë piroteknike dhe fishekzjarrë pa leje
Blutë nisën procedim penal ndaj pronarëve të subjekteve.
Njoftimi i plotë:
Policia e Vlorës ka shtuar masat për parandalimin e shitjes së lëndëve piroteknike dhe fishekzjarrëve që rrezikojnë sigurinë publike, jetën dhe shëndetin e njerëzve.
Procedohen penalisht 3 pronarë subjektesh, sekuestrohet një sasi e konsiderueshme fishekzjarrësh.
Shërbimet e Komisariatit të Policisë Vlorë, gjatë kontrolleve të ushtruara në disa subjekte tregtare në qytetin e Vlorës, evidentuan 3 subjekte që tregtonin lëndë piroteknike dhe fishekzjarrë pa leje dhe, në vijim të veprimeve, nisën procedimin penal për pronarët e tyre, shtetasit F. V., 67 vjeç, E. H., 58 vjeç, dhe A. F., 29 vjeçe.
Materialet iu referuan Prokurorisë pranë Gjykatës së Shkallës së Parë Vlorë për veprën penale “Tregtimi dhe transportimi i mallrave që janë kontrabandë”.
Policia apelon të gjithë qytetarët që të shmangin jo vetëm tregtimin, por edhe përdorimin e lëndëve piroteknike dhe fishekzjarrëve pa leje , duke mos rrezikuar jetën dhe sigurinë publike . Çdo rast shkeljeje mund të denoncohet në numrin 112 ose Komisariatin Dixhital, me garanci për anonimat dhe reagim të shpejtë.
