Nuk janë 3 por 11 oficerë dhe funksionarë të lartë policie që dyshohet se janë përfshirë në trafik droge. Për tre prej tyre tashmë urdhër-ndalimet janë lëshuar nga prokuroria, por burimet nga prokuroria deklarojnë se janë edhe 8 të tjerë nën hetim.
Televizioni ‘Abcnews’ raporton se bëhet fjalë për ish-drejtorë policie dhe shefa komisariatesh, të cilët kanë qenë në detyrë ose që akoma mbajnë veshur uniformën blu. Prokuroria pritet të nxjerrë gjatë këtyre ditëve urdhër-arrestet për ta.
“Aktualisht janë nën hetim për trafik të lëndëve narkotike edhe 8 drejtorë dhe ish-drejtorë qarqesh të Policisë Vendore ose shefash komisariatesh. Hetimet shtrihen në Fier, Vlorë, Berat, Gjirokastës, Durrës, Lezhë dhe Shkodër”, thanë burimet.
Sakaq mësohet se Prokuroria i kishte prej kohësh nën përgjim Jeald Çelën, Sokol Boden dhe Gjergji Kohilën. Ish-drejtuesit e lartë të policisë së Vlorës të shpallur në kërkim për dosjen “Habilaj”, ishin implikuar një vit më parë në sasinë e rekord të drogës së sekuestruar në Vezhdanisht dhe Treblovë.
Sipas burimeve nga organi i akuzës, Jeald Çela ish-drejtori i qarkut Vlorë së bashku me dy vartësit e tij Gjergj Kohila dhe Sokol Bode ishin personat që kishin garatuar paprekshmërinë e grupit kriminal të drejtuar nga Moisi Habilaj.
Në atë kohë, pra në Tetor të 2016, hetimet përfshinë dhe shefin e zyrës së Krimit Ekonomik në policinë e Vlorës, Renaldo Avduli. Përgjimet kanë nisur pas një raporti të SHISH për zonat e kultivimit të lëndës narkotike dhe përfshirjen e policisë në trafik. Në dosjen hetimore thuhet se Renaldo Avdyli mbante kontakte me njërin prej drejtuesve të rrjetit të trafikut, Taulant Haxhiraj. Ata komunikonin edhe për pazaret, për çmimin dhe mënyrën e vendin ku do të shisnin hashashin.
Kujtojmë se pjesë e këtij mega-operacioni që po zhvillohet paralelisht në Itali dhe Shqipëri është edhe ish-ministri i Brendshëm Saimir Tahiri. Emri i tij doli nga përgjimet e Italianëve. Ku kushërinjtë-trafikantë me mbiemrin Habilajt përmendin edhe shumat e parave që duhet ti çonin Saimirit…
/Opinion.al
*Foto ilustruese
