Policia e Shtetit ka reaguar zyrtarisht në lidhje me vrasjen e 25-vjeçarit Klodjan Rasha, i cili u qëllua me dy plumba nga një efektiv policie, pasi kishte dalë gjatë orës policore dhe nuk i ishte bindur urdhrit për të ndaluar.
Përmes një deklarate, Policia sqaron se po vijojnë intesivisht hetimet për zbardhjen e plotë të rrethanave të ngjarjes së rëndë.
Ky institucion, shprehet se krahas hetimeve të nisura nga organet e pavarura për zbardhjen e ngjarjes, strukturat përgjegjëse në Policinë e Shtetit po analizojnë të gjithë shkaqet, veprimet, mosveprimet apo faktorë të tjerë që çuan në incidentin fatal.
REAGIMI I POLICISË SË SHTETIT
Në emër të punonjësve të Policisë së Shtetit, të prekur nga ngjarja e rëndë që ndodhi një ditë më parë në Tiranë, e cila përfundoi me vrasjen tragjike të të riut Klodjan Rasha, i shprehim ngushëllimet më të sinqerta familjarëve, miqve, të afërmve dhe qytetarëve të lënduar nga ky akt.
Pas ngjarjes së ndodhur, krahas hetimeve të nisura nga organet e pavarura, për zbardhjen e plotë të rrethanave të ngjarjes, strukturat përgjegjëse në Policinë e Shtetit po analizojnë në mënyrë intensive të gjithë shkaqet, veprimet, mosveprimet apo faktorë të tjerë që çuan në incidentin fatal.
Policia e Shtetit garanton qytetarët se mbetet e përkushtuar dhe e angazhuar në detyrën e saj për rritjen e sigurisë publike, në mbrojtje të jetës dhe të drejtave të çdo qytetari./ Opinion.al
