Policia e Kosovës ka arrestuar 14 persona gjatë protestës së sotme të zhvilluar në Prishtinë. Këtë e ka konfirmuar zëdhënësi i Policisë Baki Kelani, i cili tha se janë arrestuar protestuesit që janë parë si më të dhunshmit.
Sa i përket deputetit të Vetëvendosjes, Albin Kurti, i cili u pa sot në turmën e protestuesve, Kelani tha se nuk kanë reaguar për shkak se nuk kanë dashur ta tensionojnë situatën. Sipas tij, ata do të gjejnë momentin e duhur për ta arrestuar atë.
“Ne kemi vërejtur se Kurti ka qenë në turmën e protestës, mirëpo ne nuk kemi reaguar. Në ato momente kemi vlerësuar për shkak të situatës dhe tensioneve që kanë qenë dhe në bazë të vlerësimeve tona policore do të gjendet momenti i duhur për të realizuar fletarrestimin ashtu edhe siç jemi të obliguar”, tha Kelani.
Sipas Kelanit, Policia e Kosovës ka qenë e detyruar të reagojë në momentin që ka eskaluar situata, në mënyrë për të siguruar ruajtjen dhe rendin e sigurisë publike.
Kelani tha se nga kjo protestë kanë mbetur të lënduar edhe 5 zyrtarë policorë, të cilët kanë pësuar lëndime të natyrave të ndryshme.
“Ne jemi detyruar që me njësitë tona të reagojmë për të vënë situatën nën kontroll dhe njëherësh për të parandaluar dhunën e shfaqur nga këta protestues. Si pasojë e gjithë kësaj mund të them se deri tani sipas informacioneve që kemi 5 polic kanë pësuar lëndime të natyrave të ndryshme dhe njësitë e tona kanë arritur të arrestojnë dhe shoqërojnë deri tek stacioni policorë 14 protestues të dhunshëm. Ajo çfarë vlen të theksohet është se policia në vendin e ngjarjes ka gjetur dhe ka konfiskuar një çantë në të cilën janë gjetur sasi të ndryshme të koktej molotovi”, tha Kelani.
