Policia e Shteti e ka shpallur në kërkim, ndërkohë që një nga institucionet e tjera në varësi të Ministrisë së Brendshme i ka dhënë një tender kompanisë së Agim Kajmakut.
Sipas buletinit të fundit të Agjencisë së Prokurimeve Publike rezulton se kompania “Kajmaku sh.p.k”, në pronësi të gruas së Agim Kajmakut, Merita Kajmaku, ka fituar një tender me vlerë pak më shumë se 5 milion lekë për mirëmbajtjen e luleve dhe hapësirave të gjelbra në territorin e QSUT.
Tenderi është prokuruar nga Agjencia e Blerjeve të Përqendruara, një institucion në varësi të Ministrisë së Brendshme, ashtu siç është edhe Policia e Shtetit që ndjek Agim Kajmakun.
Më 15 korrik të vitit të shkuar ish-kryebashkiaku i Vorës hoqi dorë nga biznesi i tij duke ia kaluar bashkëshortes të gjitha aksionet.
Pas denoncimeve të PD, Agim Kajmaku u shkarkua nga detyra për falsifikim të formularit të dekriminalizimit pasi nuk kishte deklaruar procedimin nga prokuroria greke. Më pas akuzat ndaj tij u shtuan pasi u zbulua se kishte firmosur urdhra edhe pas shkarkimit nga detyra nga KQZ-ja. Ai është ende në kërkim nga policia ndërsa biznesi në pronësi të gruas vijon të lulëzojë me fonde publike. /Opinion.al
