Policia e Korçës ka bërë gati dosjen për 40-vjeçaren Valmira Hasimllari, e cila pritet që t’i referohet Prokurorisë.
Nga rrethanat e ngjarjes, dinamika dhe provat e tjera të grumbulluara gjatë hetimit, policia i ka kualifikuar veprimet e 40 vjeçares sipas nenit 81 të Kodit Penal, që parashikon vrasjen me dashje të foshnjes.
Burime zyrtare të Prokurorisë së Korçës bënë të ditur se pas referimit të dosjes nga policia, organi procedues do të kërkojë ekzaminim të gjendjes mendore të nënës që mbylli foshnjen e sapolindur në valixhe, për të përcaktuar shkalën e përgjegjësisë penale ose mungesën e saj, për shkak të çrregullimeve të rënda mendore.
Prokuroria pritet të vlerësojë nëse janë kushtet që ndaj 40-vjeçares të kërkohet si masë sigurimi, shtrim i detyruar në spital.
Valmira Hasimllari u dërgua dje për trajtim në Spitalin Psikiatrik të Elbasanit ndërsa priten konkluzionet e ekspertimit të mostrave të foshnjes nga Instituti i Mjekësisë Ligjore, për të mësuar nëse foshnja ka lindur i gjallë./Klan News
