Policia e Lezhës në bashkëpunim me forcat RENEA, ditën e sotme, kanë arrestuar disa persona, mes tyre edhe Danjan Ndoka, nipi i ish-deputetit të PS, Arben Ndoka.
Ai akuzohet se gjatë ditës së zgjedhjeve në 25 qershor, plagosi Florian Dushkun, aktivist të LSI-së.
Në një deklaratë për mediat, drejtori i Policisë së Lezhës, Bledar Çeliku dha detaje nga operacioni, ndërsa pohoi se gjatë aksionit u sekuestrua drogë, armë dhe pasuri që dyshohet se vjen nga aktivitete kriminale.
Çeliku tha se ka nisur hetimi për 30 persona, duke theksuar se janë referuar në Prokurorinë për Krime të Rënda Tirane 14 raste të hetimeve pasurore, në Prokurorinë e Rretheve Gjyqësorë Lezhë dhe Kurbin 15 raste të veprës penale të “Pastrimit të produkteve të veprës penale”.
Pas ngjarjes në Elbasan, Lezha u përmend nga drejtuesit e policisë, si qarku me kriminalitet të lartë. Kështu, në kuadër të operacionit policor të koduar ‘Vjeshtë 2017’, u sekuestrua pasuri me një vlerë prej 872 mijë euro, që dyshohet se janë krijuar nga veprimtari kriminale.
Pasuritë e vëna nën sekuestro preventive:
– godine banimi 3 kate, bar kafe,
– 4 apartamente banimi,
– 4 automjete luksoze
– 1 llogari bankare prej 41.000 Euro
– 1 sipërfaqe toke pemëtore prej 15.000 m2.
