Policia ka arritur të arrestojë Aldi Ramën, autorin e dyshuar të vrasjes së oficerit të Krimeve të Policisë së Lezhës, Saimir Hoxha.
Sipas informacioneve Rama fillimisht ka tentuar të vetëvritet, por ka mbetur i plagosur, në gjendje kritike për jetën.
“Forcat e Policisë kanë krijuar perimetrin e sigurisë dhe i kanë bërë thirrje autorit që të dorëzohej, por autori i ngjarjes, shtetasi Aldi Rama nuk i është përgjigjur thirrjes së Policisë për t’u dorëzuar, por është vetëplagosur me armën e tij. Aktualisht po transportohet nga forcat e Policisë për në spital, në gjendje kritike për jetën”, tha Policia në një njoftim për mediat.
Kujtojmë se oficeri i Krimeve në Policinë e Lezhës, Saimir Hoxha mbeti i vrarë këtë të martë gjatë një kontrolli për parandalimin e kultivimit të bimëve narkotike. Efektivi 44-vjeçar ishte nga Puka dhe prej vitesh ishte punonjës policie në Lezhë dhe Shëngjin.
