Pasi boss-i i drogës i shpallur në kërkim ndërkombëtar për trafik droge Kelmend Balili çoi në shkarkimin e një ministri dhe përfshiu në debate të ashpra koalicionin qeverisës duket se është intensifikuar puna e policisë për kapjen e tij. Sot njoftohet se janë vënë në dispozicion 50 milion lekë (të vjetra) për këtë që informon mbi vendndodhjen e tij. Theksojnë se pas dy ditësh do të mblidhet edhe Këshilli i Sigurisë Kombëtare për këtë çështje.
“Policia e Shtetit ka vënë në dispozicion të kujtdo qytetari që ka informacion apo ndihmon për kapjen e shtetasit në kërkim Kelmend Balili, shumën prej 50 milion lekësh (të vjetra). Duke garantuar anonimatin, Policia ka vënë në dispozicion këtë numër telefoni 0694109188”, thuhet në njoftimin e Policisë së Shtetit.
Kelmend Balili është hetuar nga policia dhe prokuroria greke dhe dyshohet se ka kryer trafik droge në sasi të mëdha. Ai është cilësuar nga media ndërkombëtare si Eskobari i Ballkanit.
Akuzat e para që lidhnin emrin e tij me politikën janë artikuluar nga PD-ja. Më pas ishte ambasadori amerikan Donald Lu që akuzoi direkt ministrat Tahiri dhe Manjani për mosarrestimin e Balilit. Kjo çoi edhe në tensionimin e situatës, pasi Manjani (tashmë i shkarkuar) tha se është policia dhe prokuroria që kanë vonuar urdhër-arrestin dhe kërkimet për ta gjetur të shumëkërkuarit. Madje, Manjani në konferencën e fundit për shtyp mes shumë akuzash ndaj Qeverisë tha se amerikanët i kanë kërkuar Ramës të shkarkojë ministrin Tahiri pikërisht për këtë çështje. /Opinion.al
