Detaje të reja kanë dalë nga dosja hetimore e vrasjes së 25-vjeçarit, Klodian Rasha, nga efektivi i Forcës “Shqiponja”. Kolegu i efektivit që qëlloi 25-vjeçarin ka thënë se ka pasur përleshje fizike mes viktimës dhe autorit.
Sipas gazetares Klodiana Lala, kolegu me iniciale E.Gj., ka rrëfyer se në momentin e përleshjes efektivi i policisë ka rënë në tokë dhe në atë moment ka qëlluar dy herë mbi Klodian Rashën.
“Autori nuk pranon se ka pasur përplasje fizike me Klodian Rashës, ndërsa kolegu i tij e përgënjeshtron këtë. Në një moment, thotë ai, Klodian Rasha dhe efektivi janë përleshur fizikisht, ndërsa shton se vetë ka qenë në disntancë 100 metra. Sipas tij, polici ka rënë në tokë dhe në atë moment ka qëlluar dy herë ndaj të riut.”-tha gazetarja.
Gjithashtu, bëhet me dije se në dosje shkruhet se njëri plumb e ka kapur në shpatull Klodian Rashën, ndërsa plaga në kokë është një plumb që e ka kapur shkarazi.
“Familja Rasha pretendon se djali i tyre është qëlluar me dy plumba, ndërsa në dosje thuhet se njëri plumb e ka kapur në shpatull, kurse plaga në kokë është një plumb që e ka kapur shkarazi. Autori pretendon se e përdori armën pasi kishte frikë se Klodian Rasha ishte i armatosur, por ky i fundit nuk ka pasur armë. Familja Rasha ka dyshime të forta se policia ka tentuar të manipulojë ngjarjen”, është shprehur Lala./Opinion.al
