Qazim Rasha, babai i Klodjan Rashës i cili u ekzekutua mëngjesin e djeshëm nga një efektiv policie ka folur përsëri për mediat.
Babai i 25-vjeçarit, me lot në sy, kërkon drejtësi për ngjarjen e rëndë, ndërsa thekson se djali i tij i ishte shmangur policisë për shkak se nuk kishte vendosur maskë dhe ndodhej jashtë gjatë orës policore.
Qazim Rasha tha se policia është për të mbrojtur qytetarët dhe jo për ti vrarë ata vetëm pak metra larg shtëpisë.
“Dhimbja ime është edhe e juaja. Dhimbja ime është e të gjithëve, e çdo race, e çdo babe, e çdo nëne. Lind dhe rritet dhe të jep dhe të merr Zoti. Drejtësia të bëjë drejtësi. Mos të na vrasi çdo minutë. Mos të na vrasi. Jo të më vijë djali mua në rrugicë, dhe të më vritet tek rrugica e shtëpisë. Kush mund ta bëjë këtë?! Kush është ai polic?! Çfarë policie është ajo që të vret në derë të shtëpisë. Policia është për të mbrojtur, jo për të vrarë. Djali ishte duke punuar në llaç gjithë ditën në shtëpi dhe doli të marrë cigare. Për maskën iku dhe e vranë. Prisja ta martoja, jo ta çoja në arkivol.”,-tha babai i viktimës.
Klodjan Rasha u qëllua me dy plumba nga një efektiv policie gjatë orëve të para të mëngjesit të djeshëm. Pas ekzekutimit të të riut, Policia e Shtetit njoftoi zyrtarisht se viktima e kishte kërcënuar efektivin me një send të fortë që në dukje ishte armë zjarri dhe se efektivi i policisë në kushte vetëmbrojtje dhe errësire e qëlloi me armë.
Po ashtu, në shumë media qarkulloi lajmi se në afërsi ku ndodhi ngjarja u gjet dhe një pistoletë që dyshohej se i përkiste 25-vjeçarit. Por ky version u rrëzua nga familjarët të cilët deklaruan me bindje se djali i tyre nuk ka pasur armë, ndërsa banorët e tjerë kanë deklaruar se rruga ka ndriçim. Në këtë mënyrë bie poshtë versioni i policisë, e cila deklaroi se efektivi e qëlloi të riun në kushte të errësirës.
Disa orë më vonë, Shërbimi për Çështjet e Brendshme dhe Ankesave pas hetimeve të kryera ka konstatuar se efektivi i policisë që vrau 25-vjeçarin Rasha, ka vepruar në shkelje të ligjit, pasi nuk ka qenë në kushtet e vetëmbrojtjes dhe për këtë arsye ai u arrestua./ Opinion.al
