Edhe pse sëmundja e Trompozës i ka marrë të dyja këmbët ndërsa shteti nuk i lidh pensionin e invaliditetit. 42-vjeçarja Adriatike Muço nga Trebinja e Pogradecit prej më shumë se 7 muajsh dergjet në shtrat per shkak të sëmundjes së trompozës e cila fillimisht i mori njërën këmbë ndërsa pak javë më parë mjekët i kanë prerë edhe këmbën tjetër pasi sëmundja ishte përhapur frikshëm edhe në këmbën tjetër.
Edhe pse të afërm të 42-vjeçares i kanë futur letrat për trajtimin e saj me pension invalidi, ajo ende nuk ka mundur ta përfitojë atë. Duket se ngërçi kryesor janë ndryshimet ligjore të cilat kërkojnë që në 5 vitet e fundit ajo të ketë 1 vit të siguruar gjë të cilën 42-vjeçarja nuk e ka, pasi atje ku ka punuar për gati 8 vjet nuk i janë paguar sigurimet shoqërore.
Sot përveçse pa këmbë Adriatikja duhet të përballet edhe me mungesën e parave për të blerë ilaçet që i duhen për t’u mjekuar. Këtë të shtunë ajo u vizitua nga deputetja e PD-së në Qarkun e Korçës, Eleina Qirici e cila u njoh nga afër me gjendjen e 42 vjeçares ndërsa premtoi se do të ndjekë çdo rruge ligjore në mënyrë që ajo të përfitojë atë ç’ka i takon në gjendjen në të cilën ndodhet.
Qirici i ka nisur kontaktet e para në institucionet përkatëse qysh ditën e sotme ndërsa javën e ardhshme mund të jepen edhe rezultatet e para.
Adriatike Muço ka edhe një vajze gjimanziste e cila tashmë duhet të zgjedhë mes shkolles dhe kujdesit ndaj nënës së saj e cila ka nevojë 24 orë për sherbim. Aktualisht familja nuk përfiton asnjë ndihmë nga shteti shqiptar.
