Administratori i Proptishtit në Pogradec, Gëzim Alla, është pezulluar nga detyra, pasi një ditë më parë i preu veshin kushëririt pas një konflikti për vijën e ujit
Kushëriri i tij, Kujtim Alla përfundoi në spital me plagë të rënda, vesh të prerë dhe brinjë të thyera.
Nisur nga komunikata e policisë, kreu i Bashkisë së Pogradecit, Eduart Kapri ka vendosur pezullimin nga detyra të administratorit të Njësisë Administrative Proptisht, Gëzim Alla.
“Bashkia Pogradec dhe kryetari Eduart Kapri, distancohen nga akti i kryer, kritikojmë dhe dënojmë ashpër çdo akt dhe konflikt që cenon individin në veçanti dhe komunitetin në përgjithësi, si dhe u bën me dije banorëve të Bashkisë Pogradec dhe specifikisht banorëve të Njësisë Administrative Proptisht, se nga dita e sotme, 26 dhjetor 2015. administratori Gëzim Alla pezullohet nga detyra. Dënojmë dhe distancohemi tërësisht nga çdo akt dhune dhe cenimi, duke besuar se mund te bashkëjetojmë vetëm mes veprimit të ligjit, arsyes dhe jo forcës.
Falënderojmë komisariatin e policisë Pogradec për gatishmërinë dhe bashkëpunimin e tyre. Kryebashkiaku Eduart Kapri”, thuhet në njoftimin e Bashkisë së Pogradecit.
Policia ka ndaluar një prej vëllezërve të Gëzim Allës, por familjarët e të dëmtuarit thonë se është administratori i njësisë përgjegjës për plagosjen. Ata kërkojnë arrestimin e administratorit, pasi në të kundërt paralajmërojnë vetëgjyqësi. (Panorama.com)
