Policia ka vënë në pranga drejtuesin e automjetit që mbrëmjen e djeshme përplasi për vdekje një 15-vjeçar.
Ngjarja ndodhi në aksin rrugor “Sarandë-Ksamil”. Mjeti me të cilin po udhëtonte i mituri pësoi defekt dhe si rrjedhojë, sipas policisë, disa persona dolën për ta shtyrë atë.
Në këtë moment ata janë përplasur nga një automjet tip “Benz” që po udhëtonte në të njëjtin drejtim që drejtohej nga një 20-vjeçar.
Si pasojë e përplasjes 15-vjeçari E. Ç., humbi jetën në spital.
“Në vijim të informacionit paraprak të dhënë mbrëmjen e djeshme, për një aksident rrugor të ndodhur në aksin rrugor “Sarandë-Ksamil”, ju informojmë se në përfundim të veprimeve procedurale të kryera për këtë rast, specialistët e Seksionit të Policisë Rrugore të Komisariatit të Policisë Sarandë arrestuan në flagrancë shtetasin E. A., 20 vjeç, banues në Sarandë, pasi duke drejtuar automjetin tip “Benz”, ka goditur automjetin tip “Lancia”, që po shtyhej nga disa shtetas, për shkak se kishte pësuar defekt. Për pasojë humbi jetën në spital, njëri nga këta shtetas, E. Ç., 15 vjeç, si dhe mbeti i dëmtuar drejtuesi i automjetit “Lancia”, shtetasi D. Ç., 24 vjeç, i cili aktualisht ndodhet në spitalin e Traumës, në kujdesin e mjekëve”-njofton policia.
