Një operacion policor i koduar “Dyshimi” është finalizuar nga policia , si rezultat i të cilit është parandaluar një ngjarje e mundshme kriminale.
Policia bën me dije se ka lokalizuar një automjet tip “Toyota”, të parkuar në afërsi të një pallati në Kune, Shëngjin, dhe kanë ndërhyrë për të neutralizuar personat që ndodheshin në automje. Këta të fundit sapo kanë parë shërbimet e Policisë duke u afruar, kanë dalë menjëherë nga automjeti dhe kanë tentuar të largohen me vrap.
Gjatë tentativës për t’u larguar shtetasja F. B. (drejtuesja e automjetit), ka tentuar njëkohësisht që të fshehë edhe një armë zjarri, në afërsi të vendit ku automjeti ishte i parkuar. Arma e zjarrit kallashnikov, së bashku me krehër e me fishek në fole, është gjetur më pas nga shërbimet e policisë.
Ndërkohë është kontrolluar automjeti dhe është gjetur një krehër automatiku me fishekë në të, ndërsa gjatë kontrollit të ushtruar në çantën e dorës së 34-vjeçares me inicialet F. B., janë gjetur 2 radio marrëse – dhënëse, si ato të Policisë. Si rrjedhojë është arrestuar 34-vjeçarja si dhe 28-vjeçari, Nikoll Sherniku i cili ishte dënuar me masë sigurie “Arrest në shtëpi”, në lidhje me implikimin e tij në ngjarjen e ndodhur në dhjetor 2021, ku mbeti i vrarë me armë zjarri ish-punonjësi i Policisë, shtetasi Xhuliano Prela. Policia bën me dije se në automjet ishte dhe një djalë 15-vjeçar.
Në përfundim të veprimeve hetimore, u sekuestruan në cilësinë e provës materiale 1 automatik, 2 krehëra me fishekë në to, 2 radio marrëse – dhënëse si të Policisë, si dhe automjeti i blinduar me të cilin lëviznin këta persona.
28-vjeçari, Nikoll Sherniku, banues në Kurbin, akuzohet për veprat penale “Mbajtja pa leje e armëve, armëve shpërthyese dhe municionit” dhe “Largimi i të burgosurit nga vendi i qëndrimit”;
Ndërsa F. B., 34 vjeçe, banuese në Kurbin, akuzohet për veprat penale “Moskallëzimi i krimit” dhe “Veprime që pengojnë zbulimin e së vërtetës”.
Bazuar në hetimet e deritanishme lindin dyshime se lëvizja e këtyre personave me automjetin e blinduar, në role të ndryshme, ishte për të realizuar një ngjarje kriminale. Për shkak të ruajtjes së sekretit hetimor, nuk bëhen të ditura të dhëna të tjera në lidhje me rastin.
