Blutë e Shkodrës kanë arrestuar në flagrancë dy persona, të cilët po ndihmonin 9 shtetas algjerianë të kalonin kufirin, kundrejt fitimit.
Në pranga ranë 30-vjeçari A.A. banues në fshatin Vrakë, në Malësi të Madhe si dhe 45-vjeçari F. H., banues në fshatin Boriç i Madh, në Malësi të Madhe.
Ata u kapën në afërsi të pikës kufitare, Hani i Hotit teksa me mjetet e tyre po transportonin 9 shtetas të huaj algjerianë dhe tunizianë, me destinacion Malin e Zi dhe pastaj vendet e BE-së.
Njoftimi i policisë:
Parandalohet dhe goditet një tjetër tentativë për dhënie ndihme për kalim të paligjshëm të kufirit, kundrejt fitimit.
Operacion nga strukturat e Drejtorisë Vendore të Policisë Shkodër.
Arrestohen në flagrancë dy persona, për dhënie ndihme për kalim të paligjshëm të kufirit, të cilët transportonin 9 shtetas algjerianë.
Nga strukturat e Drejtorisë Vendore të Policisë Shkodër, në vijim të operacioneve të njëpasnjëshme të zhvilluara për parandalimin dhe goditjen e tentativës për dhënie ndihme për kalim të paligjshëm të kufirit, bazuar dhe në informacionet e marra në rrugë operative, pas një pune të mirorganizuar u arrestuan në flagrancë shtetasit:
A. A., 30 vjeç, banues në fshatin Vrakë, Malësi e Madhe;
F. H., 45 vjeç, banues në fshatin Boriç i Madh, Malësi e Madhe;
Arrestimi i tyre u bë, pasi në afërsi të PKK Hani i Hotit u kapën teksa me mjetet e tyre po transportonin 9 shtetas të huaj algjerianë dhe tunizianë, me destinacion Malin e Zi dhe pastaj vendet e BE-së.
Materialet iu referuan Prokurorisë së Rrethit Gjyqësor Shkodër, për veprën penale “Ndihma për kalim të paligjshëm të kufijve“./Opinion.al
