Nëse raketat me rreze të gjatë të siguruara nga SHBA do të përdoren për të sulmuar në thellësi të territorit rus, Moska do ta konsiderojë atë si një sulm nga Shtetet e Bashkuara dhe jo Ukraina. Ky ishte reagimi i Kremlinit zyrtar, pasi administrata Biden dha dritën jeshile për një lëvizje të tillë.
Zëdhënësi Dmitri Peskov shtoi se Rusia dhe Putin e kishin bërë shumë të qartë pozicionin e tyre, dhe se vendim i Uashingtonit sinjalizon një nivel të ri përfshirje në konflikt.
“Është e qartë se administrata në largim në Uashington ka ndërmend të vazhdojë t’i hedhë benzinë zjarrit dhe të provokojë përshkallëzime të mëtejshme lidhur me konfliktin”, tha Peskov.
Shefi i Politikës së Jashtme të bashkimit Europian Josep Borrell e mirëpriti vendimin e Biden, dhe tha se shpresonte që edhe shtetet anëtare të BE të lejonin Ukrainën të përdorte armatimet e tyre për të sulmuar në thellësi të Rusisë. Franca ka sugjeruar më herët se ky mbetej një opsion në tryezë. Ministrja e jashtme gjermane Annalena Baerbock e cilësoi këtë si një vendim tejet të rëndësishëm.
“E kam thënë disa herë se Ukraina duhet të jetë në gjendje të përdorë armatimet që i japim jo vetëm për tu mbrojtur por edhe për të sulmuar. Shpresoj që shtetet anëtare të dakordësohen për ta lejuar diçka të tillë”, tha Borrell.
“Vendimi amerikan, i cili dua të theksoj se nuk është një rikonceptim i strategjisë, por intensifikim i asaj që kemi bërë deri tani, është shumë i rëndësishëm në këtë moment”, tha Baerbock .
Ukraina i ka përdoru raketat amerikane me rreze të gjatë ATACMS në territoret e pushtuar prej më shumë se një vit. Por deri më tani Uashingtoni e kishte penguar t’i shfrytëzonte ato për sulme brenda Rusisë. Me dritën jeshile, Kievi mund të shënjestrojë pozicione ruse përfshirë baza ushtarake, infrastrukturë dhe depo armësh.
