Kryeministri Edi Rama ka deklaruar se nuk do të ngelë pa punë nëse nuk fiton zgjedhjet në 11 Maj.
Teksa iu përgjigj komenteve në rubrikën “Sy m’sy”, Rama deklaroi se ajo që po bën nuk është punë, por mision për ta çuar Shqipërinë në BE.
Ndërsa theksoi se ka shumë punë të tjera që do të bëjë, Rama tha se vetëm kur të çojë flamurin shqiptar në oborrin e BE, atëherë mbaron misioni i tij.
“Pasaporta evropiane nuk është mashtrim, por rezultat i anëtarësimit në BE. Me punë të ndershme nuk punon dot në Evropë sepse duhet të kesh letra, që të kesh letra duhet të jesh i pranuar si i tillë në Evropë dhe Botë.
Sa i përket zanatin tim që ngel pa punë po nuk fitove zgjedhjet. Unë e vetmja gjë që kam shumë të sigurt është që kam plot gjëra të tjera që dua të bëj. Dua të bëj jo vetëm këtë që bëj, por këtë që bëj e bëj sepse për mua është mision dhe jo punë.
Po të mos ishte mision nuk do humbisja asnjë sekondë për të komunikuar me dikë si ti që shan. Por të respektoj edhe ty sepse je një nga forcat, një nga qelizat e gjalla të këtij vendi. Une e kam për detyrë të komunikoj edhe me ty, të pranoj edhe sharjet e tua.
Nuk është punë kjo, unë jam në këtë mision për të bërë atë që kam thënë, për të çuar flamurin në oborrin e BE, aty mbaron mision im”, tha Rama.
