Kryeministri Edi Rama në një prononcim për gazetarët nga Shkupi, lidhur me Planin e Rritjes u shpreh se: “Po na afron me BE-në, po ecën si duhet! Jemi krenarë sepse kemi përmbushur të gjitha pikat për zbatim.”
Ndër të tjera kreu i qeverisë shqiptare pohoi se nuk kemi qenë kurrë më afër realizimit të një aspirate shumë shekullore.
“Kurrë nuk kemi qenë më afër realizimit të një aspirate shumë shekullore do thosha. Jemi shumë afër dhe besoj që do përmbushim të gjitha detyrimet tona siç kemi paraparë afatet nga Komisioni Europian dhe plani i përbashkët të realizohet siç duhet”, shtoi ai.
Kjo është dita e dytë e samitit të Ballkanit Perëndimor në Shkup, ndërsa sot, 1 korrik, Komisionerja për Zgjerimin Marta Kos u shpreh optimiste për rrugën e Shqipërisë drejt BE-së.
Duke iu drejtuar kryeministrit Edi Rama, Kos tha se nëse vazhdohet kështu, Shqipëria mund të hapë të gjithë kapitujt deri në fund të vitit.
“Shqipëria, i nderuar zoti kryeministër Edi Rama, hapi tre kapitur në gjashtë muajt e fundit. Ju faleminderit që ndikuat në procesin e zgjerimit. Nëse vazhdoni kështu do të mund të hapim të gjithë kapitujt këtë vit. Siç thashë dje mezi pres ta festoj hapjen e kapitullit të fundit”, u shpreh Kos.
