Sipas Policisë, një konflikt i çastit mes katër personave ka përfunduar me tre të plagosur, një me armë zjarri dhe dy të tjerët me thikë.
Ngjarja ka ndodhur në lagjen numër 11, në rrugën “Kumini”, vetëm 100 metra larg qendrës së Durrësit, ndërsa të plagosur kanë mbetur
Elvis Kurti, i cili ka marrë dy plagë me armë zjarri.
Kurse dy të plagosurit e tjerë me thikë, janë Ervin Qerimi dhe Eloert Hoxha.
Burime nga spitali i Durrësit, ku personat e plagosur shkuan për ndihmë mjekësore, thanë se të tre të rinjtë ndodhen jashtë rrezikut për jetën
Në konflikt është përfshirë edhe Elton Hoxha, person me precedentë të mëparshëm penalë. Grupi hetimor, i cili po dokumenton ngjarjen, sqaron dinamikën e saj. Pak ditë më parë, shtetasi Eloert Hoxha ishte konfliktuar me Elvis Kurtin, të cilin e kishte dhunuar fizikisht.
Dje paradite, Kurti ka shkuar për t’u hakmarrë dhe pikërisht në përplasje verbale e sipër qëllon me thikë në shpatull Eloert Hoxhën,
ndërsa ky i fundit nxjerr pistoletën dhe e plagos me një plumb.
Ndërkohë, në konflikt janë përfshirë dhe dy shtetasit e tjerë, Elton Hoxha dhe Ervin Qerimi, ku në përleshje e sipër ky i fundit mbetet i plagosur me thikë.
Ngjarja ka përhapur panik ndër banorë, pasi zona në të cilën ndodhi ngjarja është ndër më të frekuentuarat në qytet.
Menjëherë në vendin e ngjarjes mbërritën dy patrulla të policisë së rendit, të cilat u vunë në ndjekje të të rinjve që tentuan të largoheshin nga vendi i ngjarjes, paçka se tre prej tyre ishin në gjendje të plagosur.
“Më datë 12.03.2016, në lagjen nr.11, në një dyqan shitje kafesh, si rrjedhojë e një konflikti çasti midis 4 shtetasve, janë plagosur 3 prej tyre, konkretisht: Elvis Kurti është plagosur me armë zjarri, Ervin Qerimi dhe Eloert Hoxha janë plagosur me thikë.
Ndërkohë, në konflikt është përfshirë edhe shtetasi Elton Hoxha. Shtetasit Elton dhe Eloert Hoxha janë edhe persona me precedentë penalë të mëparshëm. Nga ana e efektivëve të Policisë Durrës është bërë e mundur kapja e autorëve, dhe po punohet për sqarimin dhe dokumentimin e plotë të ngjarjes”, sqaroi Policia me anë të një njoftimi për shtyp./ Panorama.al
