Kush ka pushuar në Shqipëri këtë vit e ka vënë re se shumë shezlonge kanë mbetur bosh. Po kështu edhe hotelet e restorantet. E për ata që nuk e kanë parë “live” së paku kanë lexuar lajmet dhe statuset në rrjetet sociale. Por braktisjen e bregdetit tonë, sidomos nga kosovarët, nuk e pranon qeveria shqiptare. Ministri i Turizmit, Blendi Klosi, ende pa mbaruar sezoni, nxjerr shifrat që sipas tij tregojnë për rritjen e numrit të turistëve. Sipas Klosit, këtë vit ka një rritje prej 17 % të numrit të turistëve. “Në statistikat tona turistike në Shqipëri ka një numër prej 600 mijë familjarësh kosovarë që kanë hyrë nga 1 Janari deri në 31 Korrik, po i njëjti numër si vitin e kaluar packa se kushtet atmosferike kanë qenë shumë të këqija si në Kosovë edhe në Shqipëri por duke sifduar edhe motin kemi pasur po të njëjtin frekuentim në plazhet tona”, tha ai.
Po sipas Klosit, në kufirin e Qafë Morinës, në pikën më të madhe hyrëse të familjarëve kosovarë në Shqipëri, ka një shtim prej 17% nga viti i kaluar. Korriku i këtij viti ka shënuar 390 mijë vizitorë të hyrë dhe krahasuar me vitin e kaluar është një numër që ka qenë 330 mijë, pra ka një numër 17% më shumë, pra të gjitha statistikat flasin për një politikë të kuruar drejt”.
Deklarata u bë nga Prizreni, ku Klosi takoi ministrin e Tregtisë dhe Industrisë së Kosovës.
/Opinion.al
