Kriza në Maqedoni po shkon drejt BE-së edhe pse ky shtet nuk është pjesë e organizmave ndërkombëtarë. Dje ishte Presidenti maqedonas Ivanov që u shkroi ndërkombëtarëve për ndërhyrjen e Shqipërisë në punët e Maqedonisë, sot është ministri i Jashtëm i një vendi të BE dhe NATO-s që kërkon të “dënohet” Edi Rama.
Ministri i Jashtëm hungarez, Peter Szijarto deklaroi se Hungaria do të kërkojë nga vendet e tjera të BE-së që të dënojnë “platformën shqiptare” për krijimin e një qeverie të re në Maqedoni.
Kreu i diplomacisë hungareze do ta mbajë këtë qëndrim gjatë punimeve të Këshillit të Ministrave të Jashtëm të BE në Bruksel. Agjencia në gjuhën maqedonase “Mia” njoftoi gjithashtu se ministrat e Jashtëm austriak dhe grek, Sebastian Kurz dhe Nikos Kotzias janë të gatshëm ta dënojnë publikisht atë që nga Shkupi zyrtar po quhet “Platforma e Tiranës”.
Në fakt, ministri i Jashtëm austriak e shpalli hapur mbështetjen e tij për Nikolla Gruevskin kur pranoi të bënte fushatë elektorale për kryeministrin maqedonas vetëm pak orë para ditës së votimit.
Ajo që quhet “platforma e Tiranës”, sipas Gruevskit është bashkimi i partive shqiptare për të mbështetur Zoran Zaev, sipas udhëzimeve konkrete të Tiranës zyrtare.
“Në zgjedhjet e kaluara qytetarët votuan për VMRO-DPMNE-në e jo për platformën e Tiranës. Është e palejueshme që platform e Tiranës të bëhet kusht për formimin e Qeverisë në Republikën e Maqedonisë. Ajo qeveri do të ishte Qeveri e Tiranës”, u tha në një deklaratë nga VMRO-DPMNE.
