Drejtori i Policisë së Tiranës, Rebani Jaupaj, në një dalje për mediat ka dhënë detaje në lidhje me ngjarjen e regjistruar pak më parë në Tiranë, ku nga të shtënat me armë zjarri mbeti i plagosur një 19-vjeçar.
Ai ka thënë se 19-vjeçari ndodhet në Spitalin e Traumës, jashtë rrezikut për jetën. Më tej ka bërë me dije se të dyja palët ndodheshin në të njëjtin lokal dhe fillimisht janë konfliktuar fizikisht.
Jaupaj,gjithashtu thotë se policia ka një emër që do çojë në dokumentimin e plotë të ngjarjes.
“Këtu pranë kemi pasur një plagosje me armë zjarri të një 19-vjeçari i cili aktualisht ndodhet në spitalin e Traumës. Është jashtë rrezikut për jetën. Grupi hetimor po punon në vendin e ngjarjes. Ka qenë një konflikt i çastit. Të dyja palët kanë qenë në të njëjtin lokal, fillimisht janë konfliktuar fizikisht. Kanë qenë në tavolinë të veçanta. Një person ka qëlluar me armë zjarri vetëm një herë. Kemi një emër të autorit për të cilin do të bëjmë dokumentimin e plotë të kësaj ngjarje dhe do t’jua bëjmë me dije”, tha Jaupi.
