Një 39-vjeçare është arrestuar nga policia pasi dyshohet se ka ndihmuar autorin e dyshuar të plagosjes me armë zjarri të 23-vjeçarit Renaldo Mejdani në Tiranë.
Sipas policisë, 39-vjeçarja me inicialet O.I dyshohet se ndhmoi 49-vjeçarin së bashku me vëllain e autorit të dyshuar, D. Ostreni 45 vjeç, i cili është tashmë i arrestuar për përkrahje të autorit të krimit dhe deklarim të rremë përpara oficierit të policisë gjyqësore.
49-vjeçari Albert Ostreni, autori i dyshuar i plagosjes vijon të jetë në kërkim nga policia.
Kujtojmë se ngjarja ndodhi mbrëmjen e 23 gushtit në rrugën “Tasim Shehu” në Tiranë. Pas një sherri për motive të dobëta, 23-vjeçari Renaldo Mejdani u qëllua me armë zjarri nga fqinji i tij, 49-vjeçari Albert Ostreni.
Njoftimi i policisë
Në vijim të informacioneve të dhëna gjatë këtyre ditëve, në lidhje me plagosjen me armë zjarri të shtetasit R. M., 23 vjeç, ju bëjmë me dije se:
Pas referimit të materialeve dhe shpalljes në kërkim të autorit të dyshuar, shtetasit A. O., 49 vjeç, si dhe arrestimit të shtetasit D. O., 45 vjeç, për veprat penale “Përkrahja e autorit të krimit” dhe “Veprime që pengojnë zbulimin e së vërtetës”, specialistët për Hetimin e Krimeve në Komisariatin e Policisë Nr. 4 kanë arrestuar shtetasen O. I., 39 vjeçe, pasi dyshohet se në bashkëpunim me shtetasin D. O., 39-vjeçarja ka penguar zbulimin e së vërtetës, ka ndihmuar autorin e dyshuar të plagosjes të largohet nga vendi i ngjarjes, si dhe ka dhënë deklarim të rremë para oficerit të Policisë Gjyqësore. Për këtë ngjarje, vijon puna intensive për lokalizimin dhe kapjen e shtetasit A.O./Opinion.al
