Presidentja e Kosovës, Vjosa Osmani, ka reaguar pas plagosjes së policit në Veri të Kosovës.
Në një postim në “Facebook”, Osmani e cilëson ngjarjen si një kërcënim të hapur për agresion policor e ushtarak nga ana e Serbisë duke shtuar se ky veprim është kriminal dhe i orientuar kundër rendit kushtetues e sovranitetit të Kosovës.
“Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie pikërisht në vitin 1999. Plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit. Gjithashtu, sulmet ndaj gazetarëve përbëjnë cenim flagrant të të drejtës për informim të lirë”-shkruan Osmani.
Më tej ajo ka thënë që policët dhe ushtarët e Serbisë nuk do të lejohen kurrë në territorin e Kosovës.
“Autorët e këtyre krimeve, urgjentisht të sillen para drejtësisë, ndërkaq institucionet e drejtësisë duhet të veprojnë menjëherë.Në territorin e Republikës së Kosovës kurrë më nuk do të ketë policë dhe ushtarë të Serbisë! Ëndrra hegjemoniste e Serbisë nuk do të jetësohet kurrë!”-thotë Osmani.
