Drejtuesi politik i PD-së në qarkun Lezhë, Agron Gjekmarkaj ka reaguar lidhur me ngjarjen që ndodhi në Laç, ditën e sotme ku u plagosën pesë persona, mes tyre edhe një shitëse ambulante.
Përmes një postimi në rrjete sociale, Gjekmarkaj shprehet se ngjarja është dëshmi e pasigurisë së jetës dhe dështimin e strukturave të rendit.
“U bëj thirrje organeve të drejtësisë dhe hetimit të veprojnë me urgjencë për të identifikuar dhe kapur autorët e kësaj ngjarjeje, duke garantuar sigurinë dhe rendin për qytetarët.
“Plagosja e pesë personave në qytetin e Laçit është një akt i rëndë kriminal që dëshmon pasigurinë e jetës dhe rrezikun real që paraqesin personat e armatosur që lëvizin lirshëm nëpër qytete.
Një zonjë e pafajshme që shet qirinj në rrugë për bukën e gojës u qëllua nga plumbat. Kjo situatë është e pafalshme dhe tregon dështim serioz të strukturave të rendit, përfshirë drejtuesit lokalë të policisë dhe Ministrinë e Brendshme.
U bëj thirrje organeve të drejtësisë dhe hetimit të veprojnë me urgjencë për të identifikuar dhe kapur autorët e kësaj ngjarjeje, duke garantuar sigurinë dhe rendin për qytetarët”, shkruan Gjekmarkaj në rrjete sociale.
